ਇਹ ਸਮਗਰੀ
ਸਿੱਖ ਸੰਘਰਸ਼ ਦੀ ਲਾਸਾਨੀ ਹਸਤੀ: ਭਾਈ ਸੁਰਿੰਦਰਪਾਲ ਸਿੰਘ ਠਰੂਆ
ਮੈਲਬੌਰਨ (20 ਅਗਸਤ 2010): “ਸਿੱਖ ਕੌਮ ਦੀ ਚੜ੍ਹਦੀ ਕਲਾ ਲਈ ਅਣਥੱਕ ਮਿਹਨਤ ਕਰਨ ਵਾਲੇ ਅਤੇ ਜੁਝਾਰੂ ਆਗੂ ਸ: ਸੁਰਿੰਦਰਪਾਲ ਸਿੰਘ ਜੀ ਠਰੂਆ ਦਾ ਸਦੀਵੀ ਵਿਛੋੜਾ ਕੌਮ ਕਦੇ ਨਹੀਂ ਭੁੱਲ ਸਕਦੀ ਅਤੇ ਉਨ੍ਹਾਂ ਦੇ ਵਿਛੋੜੇ ਨਾਲ ਕੌਮ ਨੂੰ ਪਿਆ ਘਾਟਾ ਕਦੇ ਪੂਰਾ ਨਹੀਂ ਹੋ ਸਕਦਾ। ”
ਉਪਰੋਕਤ ਸ਼ਬਦਾ ਨਾਲ ਸਿੱਖ ਫੈਡਰੇਸ਼ਨ ਆਫ ਆਸਟ੍ਰੇਲੀਆ ਦੇ ਆਗੂਆਂ ਸ: ਮਨਜੀਤ ਸਿੰਘ ਪੁਰੇਵਾਲ, ਸ: ਜਸਪਾਲ ਸਿੰਘ, ਸ: ਸਰਵਰਿੰਦਰ ਸਿੰਘ ਰੂਮੀ, ਸ: ਜਸਪ੍ਰੀਤ ਸਿੰਘ,ਸ: ਸੁਖਰਾਜ ਸਿੰਘ ਸੰਧੂ,ਸ: ਹਰਕੀਰਤ ਸਿੰਘ ਅਤੇ ਸ: ਰਣਜੀਤ ਸਿੰਘ ਨੇ ਸ਼ੋਕ ਦਾ ਪ੍ਰਗਟਾਵਾ ਕਰਦੇ ਹੋਏ ਕਿਹਾ ਕਿ ਸ: ਸੁਰਿੰਦਰਪਾਲ ਸਿੰਘ ਠਰੂਆ ਨੇ ਜੁਝਾਰੂ ਸੰਘਰਸ਼ ਦੌਰਾਨ ਜੇਲ੍ਹ ਵੀ ਕੱਟੀ ਅਤੇ ਜੇਲ੍ਹ ਤੋਂ ਬਾਹਰ ਆ ਕੇ ਨੌਜਵਾਨਾਂ ਵਿੱਚ ਕੌਮ ਪ੍ਰਤੀ ਨਵਾਂ ਉਤਸ਼ਾਹ ਭਰਿਆ।ਉਨ੍ਹਾਂ ਨੇ ਅਕਾਲੀ ਦਲ ਪੰਚ ਪ੍ਰਧਾਨੀ ਦੇ ਸਕੱਤਰ ਵਜੋਂ ਸੇਵਾ ਨਿਭਾਈ ਅਤੇ ਪੰਥ ਪ੍ਰਤੀ ਬਣਦੀ ਸੇਵਾ ਬਾ-ਖੂਬੀ ਕੀਤੀ।
ਇਨ੍ਹਾਂ ਆਗੂਆ ਨੇ ਕਿਹਾ ਕਿ ਆਸਟ੍ਰੇਲੀਆ ਵੱਸਦੇ ਸਿੱਖਾਂ ਦੇ ਹਿਰਦੇ, ਭਾਈ ਸਾਹਿਬ ਦੇ ਚਲਾਣੇ ਦੀ ਖਬਰ ਸੁਣ ਕੇ ਸ਼ੋਕ ਵਿੱਚ ਭਿੱਜ ਗਏ ਹਨ ਅਤੇ ਆਸਟ੍ਰੇਲੀਆ ਦੇ ਪ੍ਰਮੁਖ ਸ਼ਹਿਰਾਂ ਵਿੱਚ ਉਨ੍ਹਾਂ ਨਮਿਤ ਅੰਤਿਮ ਅਰਦਾਸ ਕੀਤੀ ਜਾਵੇਗੀ ਅਤੇ ਸ੍ਰੀ ਸਹਿਜ ਪਾਠ ਜੀ ਦੇ ਭੋਗ 5 ਸਤੰਬਰ ਦਿਨ ਐਤਵਾਰ ਨੁੰ ਸ੍ਰੀ ਗੁਰੁ ਸਿੰਘ ਸਭਾ ਗੁਰੂਦੁਆਰਾ ਕਰੇਗੀਬਰਨ ਵਿਖੇ ਪਾਏ ਜਾਣਗੇ।
ਭਾਈ ਸੁਰਿੰਦਰਪਾਲ ਸਿੰਘ ਠਰੂਆ ਇੱਕ ਅਜਿਹਾ ਅਡੋਲ ਪਰਵਤ ਸੀ ਜਿਸ ਨੂੰ ਵੱਡੇ ਤੋਂ ਵੱਡੇ ਭੁਚਾਲ ਵੀ ਨਾ ਡੁਲਾ ਸਕੇ। ਖਾੜਕੂ ਸੰਘਰਸ਼ ਮੌਕੇ ਗ੍ਰਿਫਤਾਰੀ ਤੋਂ ਬਾਅਦ ਉਨ੍ਹਾਂ ਨੂੰ ਪੁਲਿਸ ਅਤੇ ਸੀ. ਆਰ. ਪੀ. ਐਫ. ਨੇ ਡੇਢ ਸਾਲ ਗੈਰ-ਕਾਨੂੰਨੀ ਹਿਰਾਸਤ ਵਿੱਚ ਰੱਖ ਕੇ ਅਕਹਿ ਸਰੀਰਕ ਅਤੇ ਮਾਨਸਿਕ ਤਸ਼ੱਦਦ ਕੀਤਾ ਗਿਆ। ਪੁਲਿਸ ਨੂੰ ਪਤਾ ਸੀ ਕਿ ਭਾਈ ਠਰੂਆ ਕੋਲ ਚੋਟੀ ਦੇ ਖਾੜਕੂਆਂ ਬਾਰੇ ਪੂਰੀ ਜਾਣਕਾਰੀ ਹੈ, ਪਰ ਉਹ ਭਾਈ ਠਰੂਆਂ ਕੋਈ ਜਾਣਕਾਰੀ ਵੀ ਨਾ ਹਾਸਿਲ ਕਰ ਸਕੇ। ਉਸ ਨੂੰ ਪੁਲਿਸ ਨੇ ਮਾਰਨ ਲਈ ਪੰਜ ਵਾਰ ਮਨ ਬਣਾ ਲਿਆ ਸੀ, ਪਰ ਅਕਾਲ ਪੁਰਖੁ ਦੀ ਐਸੀ ਬਖਸ਼ਿਸ਼ ਹੁੰਦੀ ਰਹੀ ਕਿ ਐਨ ਆਖਰੀ ਮੌਕੇ ਪੁਲਿਸ ਨੂੰ ਉਸ ਨੂੰ ਮਾਰਨ ਦਾ ਵਿਚਾਰ ਬਦਲਣਾ ਪੈਦਾ।
ਭਾਈ ਸਾਹਿਬ ਦੇ ਦਿਦਾਰ ਰੋਗੀਆਂ ਦੇ ਰੋਗ ਕੱਟ ਦਿੰਦੇ ਸਨ ਤੇ ਦਲਿੱਦਰ ਉਨ੍ਹਾਂ ਦੀ ਆਵਾਜ਼ ਸੁਣ ਕੇ ਹੀ ਹਵਾ ਹੋ ਜਾਂਦਾ ਸੀ। ਭਾਈ ਸਾਹਿਬ ਦਾ ਇੰਝ ਤੁਰ ਜਾਣਾ ਸੱਚ-ਮੁੱਚ ਹੀ ਵੱਡਾ ਘਾਟਾ ਹੈ।
ਹਰਜੋਤ ਸਿੰਘ